اليوم ٤٠

صحيت بدري وناوية اسوي اشياء كثيرة بما انها بداية الإجازة
أول شي ابى اسوي لي موعد فيشل و كمان هذا الأسبوع ان شالله عندي موعد ليزر استعدادا للعيد بإذن الله و كمان موعد أسنان لإن الطلعة برمضان تصير صعبة مررا .

بس للحين مو ضابط معاي موعد الفيشل لإن أصلا مدري وين اسويه ،لإني ابى نتيجة معينة .
من الصبح و شوشو شغالة عزف ،هدية النجاح كانت لعبة بيانو و هو اكثر شي انا متحسفة عليه الحين من قوة الإزعاج اللي قاعد يصير:)

قررت اكمل اليوم بالبيت لإن مالي خلق اطلع و ودي انظف و اغير ترتيبات الأثاث خصوصا غرفة بناتي لإن تجمعت فيها الألعاب بطريقة تخليها ماتترتب أبد و فعلا شلنا كثير من الألعاب بطريقة اختيارية و إيلاف كانت تصنف الألعاب بناء على علاقتها العاطفية مع اللعبة مو الأحدث زي شادن اللي كانت تختار الألعاب القديمة للرمي أو للتصريف ، افكر اعطيها جمعية خيرية ماادري لو راح يستفيدون منها .

ودي اشوف مسلسل جديد افكر اشوف قيم اوف ثرونز لإن اذكر من زمان حاولت اشوفه و كانت الحلقة الأولى كلها مقاطع تغث و بطلت اشوفه ، الحين افكر اعدي السيزونات الأولى و اشوف كم حلقة و اقررإذا لسا يغث و أنا من النوع اللي مستحيل اشوف مسلسل يغث أو مايشدني حتى لو كل الناس منهبلة عليه و اصلا قليل احب اشوف مسلسلات .

سوينا لنا توست بنوتيلا و اعتبرناه غدا و كنت احسب مهند راح يتغدا بالدوام و تفاجأت الساعة خمسة ونص انه بيتغدا بالبيت و بما ان ماعندي و لا عذر لتصريف موضوع الغدا قمت طبخت مكرونة على السريع و الحمدلله كانت لذيذة و هاذي الوصفة أخذتها من زمان من مدونة ميمو كتشن عبارة عن مكرونه بالثوم و ماتاخذ عشر دقايق .

جلسنا و حكينا و تقهوينا و نمنا . يوم روتيني بيتوتي باختصار الشي الوحيد اللي يويته اني خلصت الغسيل :)