اليوم ال٣٩
أمس كان يوم السبت
بدا اليوم بدري ، صحيت الساعة ٨ و اخذت شاور سريع و لبناتي برضوا.
لبسنا و طلعنا نفطر في اورنجري و تذكرت انو ناقصني غرض لشغلي و رحت اجيبه بينما كانت بقية العائلة تطلب الفطور ،
لما وصلت المحل اللي ابيه حصلته مقفل بس فتح لي العامل و اخذت اللي احتاجه و طلعت و لما وصلت للفطور كان يتقدم ،مصادفة حلوة.
فطرنا فرينش توست لاذيذ جدا :)
مع شاي و لقينا موظفة عندهم شفناها من قبل ٤شهور أو اكثر و كانت حامل و باركت لها و انبسطت مرررة و قالت لي انها جابت بنت ، حلو لما تتواصل مع الناس من حولك و تعاملهم بأهمية و لطف ،تخيل العكس لو يتذكرك أحد بخير أكيد راح ننبسط .
بعدها رجعت لحالي للفندق و اشتغلت ساعتين إلى ثلاث ساعات و الحمدلله راضية عنه و ان شالله تكون النتائج مذهلة.
لما كنا في الأفنيو كانو مشغلين أغنية لطييفة و علقت بالمخ و جلس مهند ساعة يدور عليها و كانت هي الساوند تراك لبقية الرحلة إلى ماوصلنا الدمام ،سمعناها مية مرة ،كانت البداية تقول أنا أكثر شخص بالدنيا يحبك و إنتي ماتدرين ؟!
و رحنا سيتي سنتر ،ابى اجهز لبس للعيد و لرمضان بس للأسف ماحصلت شي أبد و تغدينا في شيك شاك ،كثير سمعت انه اوفر ريتد بس والله البرقر كان يسوى ،صح البطاطس مو مرة بس البرقر بالفطر مو طبيعي حاجه لاذيذة بجد:)
و احنا بطريق الرجعه اشتهيت التشوكليت حق ارابيكا خصوصا اني ادري انها مو عندنا بالدمام ، فماخلاها بخاطري ابو شادن و رجعنا الأفنيوز اخذنا التشوكليت و الحين جالسة اتقهوى فيها .
بس رجعنا البيت الساعة ٧ و كلمت أمي و نمت بدرررري و صحيت الساعة ٦ و الحمدلله تقريبا الحين راح اكمل اسبوع تقريبا في إني انام الليل حتى لو الساعة ٢ بس انام ، المشكلة سنة كاملة اعدل في نومي و اخر شي لما تعدل بيجي رمضان الله يبلغنا إياه و. كل مجهوداتي سدى الله لايضيع لي تعب .
تعليقات
إرسال تعليق