اليوم ٤٢

صحيت الساعة ٥ الفجر ، لقيت بناتي صاحيات قبل و الغريب ان حتى بأيام المدرسة ماكانوايصحون عذا الوقت بس مع قل الكرف صار النوم القليل يكفي أو على الأقل نوم الثمان ساعات بينما بأيام المدارس ينامون ١٢ ساعة عادي، بس طبعا ماخليتهم يجلسون صاحيين لإن راح يتعبون الظهر أو العصر و راح ياخذون قيلولة و بعدها راح يتأخر نوم الليل و بعدين تطول القيلولة و ندخل في مرحلة النوم الكارثة ،اتمنى اني اقدر اسيطر على نومهم بالإجازة .

جلست الصباح ووعدت نفسي اني مااكرف زي أمس عشان ماأُرهق ، فمر الوقت و انا على الكنبة اتفرج قرايز اناتومي ، احب هالمسلسل من زمان كنت اتابعه و من أوائل المسلسلات اللي تابعتها بس مشكلة الجودة و الترجمة الجيدة كانت تعيقني و صراحة أحس إن مزاجي مو زي زمان في التفرج على المسلسلات يعني أحس. صرت اغصب نفسي بالقوة اشوفها .

طلبت فلافل صبة كان نفسي اسوي لي فطور بس اشتهيت ساندوتش الصبة اكثر و الحمدلله اكلته و انا مستانسة بس اتوقع لست شهور قدام ماراح اكله لإنه يأذي بطني .

كان عندي موعد ليزر و قمت تجهزت و طلعت انا وبناتي و مرينا على عيادة الأطفال لإن احتاج يصرفون لإيلاف أدوية البخار و طلعنا موعدي ، اعتقد هاذي سادس جلسة ليزر اسويها و ان شالله مااحتاج اكثر :)

طلعنا حديقة قريبة من العيادة دقيقتين و حاسنا التراب و الهواء بس تزحلقوا مرتين.
شادن شافت ثمار مرمية بالأرض و كانت متأكدة إنها ثمرة بلوط و إن الأشجار هي آشجارالبلوط ،في الحقيقة أنا شخصيا مااعرف شكل شجرة البلوط بس فكرة إنها ربطت الإسم بالشكل كان مذهلة.
وكملنا مشي لسوبر ماركت قريب واشتروا كل شي نفسهم فيه و اخذت لي اغراض  للكوكيز و رجعنا البيت و جلسنا ناكل ايسكريم في الصالة و اشعة الشمس لسا باقية ،كان قبل وقت الغروب ،مشهد جميل صراحة .


مزاجي اليوم ماكان في أحسن حالاته بس انتهى اليوم بمزاج جيد و مرتفع بشك أفضل من أوله ، وزني جالسة يزيد بشكل مخيف و للأسف أنا مهملة في نظامي الرياضي و الصحي بحجة فيتامين دال ،مااعرف متى اهتم و اوقف لإن فعلا مو راضية عن صحتي بهالطريقة ، و مو راضية عن اتجاهي في الأكل ، أحس اني متطرفة فيه إما أكل صحي مرة و سلطات و التزم بنظام صارم و إما افك النظام كله و اخربها .
اللي أنا محتاجته إني أرتب عدد وجباتي بالضبط و كمية أكلي بالضبط ،أعتقد لو وجبتين و سناكين راح يكون مناسب لي و تكون الوجبة الأولى مثلا ١٠ الصباح و الوجبة الثانية إذا جا ابو شادن  من الدوام و نتغدا سوا و السناكات واحد الساعة ٧ الصبح و ثاني الساعة ١٢أو ٢ الظهر.
أعتقد لازم اوقف سناكات بعد العشا لإن يأثر حتى علي نومي .
ان شالله ابدأ من بكرة