يوم حافل
مشكلتي مااعرف اكتب غير بالباب توب ،بس الحين احاول اكتب من تطبيق بلوقر الجوال ..
لما جيت بكتب عنوان التدوينة كنت بكتب يوم احتفالي و كنت اقصد حافل لكن المعنى انه مليان وناسة..
اليوم احس قلب مشحون حب و مشاعر حلوة
اول شي الصباح وديت بناتي و بعدين رحت قابلت صديقة عزيزة و ونيسة على الرغم من ان تو يمر على صداقتنا عام بس في تقارب عجيب بيننا و روح البنت طيبة و أفطرنا في مطعم بأول ..طلبت كروسان شوكليت لأن كل ماودي اطلب شي يطلع الكالوريز عالي فقررت بما اننا فيها اني اطلب كروسان شوكليت اضعف الإيمان ،مرة ثانية خطاب كروسان سادة ألذ.
انبسطت من قلبي و حسّيت اني ابى أكرر طلعات الصباح مع صديقات كثير لأن هالشيء فعلًا يملي قلبي.
رجعت الساعة ١١و كان حوالي ماوقف اتصالات من مدرسة شادن لانو سنها الأمامي يبى يذبح و منزعجة منه !
و كارفور توصيل كمان يدق و غالبا اذا كنت برا البيت للترفيه يتسلط جوالي و الناس اللي تبى تجي البيت :)
اخذت بناتي و رجعنا البيت ،سويت لهم شاور،و غسلت مجموعة ملابس ،
و قررت أخذ قيلولة و فعلا نمت نومة لذيذة الحمدلله
صحيت و اكتشفت انو ابو شادن ما تغدى بالدوام مايعني لازم اسوي غدًا و قطعت خضار كثير و جهزت صينية دجاج بالفرن.
لبسوا بناتي و لبست و طلعنا كلاس اليوقا و هالمرة لهم الكلاس
احسهم سعيدين جدا فيه
و انا الحين اكتب من كوفي ٧قرام سوا لي قهوة خورافية اثيوبية
و كان المكان فاضي فسألت الباريستا
و قالي انه حط ٢٦٠ مل مويه مع ٢٠قرام بن .
حقيقي القهوة لذيذة
عموما حظي اليوم بالقهوة مرتفع
.
الحين ابى اروح اجيب بناتي و استنى مهند يمرنا او ارجع باوبر
ماادري متى يطلع دوري بمدرسة شرق :)
تعليقات
إرسال تعليق