قهوة بداية الأسبوع

أمس كان يوم جيد بل ممتاز صحيت بدري و سويت يوقا و تقهويت و قريت و بعدها نمت الى الظهر :)
قمت الساعة ١ الظهر و لأنه سبت قررت اخلص كل اشغال البيت عشان اذا بدا الاسبوع اكون اروق اكثر بدل ماتزدحم علي المشاغل خصوصا ان هالاسبوع راح يكون عندي اربع محاضرات و مابين مشاوير الجامعة و الحضانة .
خلصت غسيل و كوي و ساعدني مهند في طوي الثياب :)
جلست اذاكر و مهند حب يطبخ لنا الغدا و بالمناسبة هو يحب الطبخ و الكبسة هي الوحيدة اللي يطبخها لكن طعمها يدفي القلب .
رحت مع بناتي مرح الأب و بالعادة السبت يروحون لحالهم بس هالمرة رحت :)
وبس رجعنا البيت العشا و تفرجنا على فريندز و نمت متأخر ع الساعة ١ تقريبا و كان نومي سيء جدا بسبب بطني و بسبب القولون و كمان التكييف يفصل و يصير حر و رطوبة فكانت نومة سيئة عشان كيذا بعد ماراحت شادن المدرسة قررت ارجع انام و ماقدرت اصحى الا الساعة عشر و نص تقريبا.
شربت قهوة لذيذة و ابتدينا اسبوع جديد .

عندي هدف جديد في علاقاتي مع الناس
عودت نفسي من سنة تقريبا على تجاهل أي شي يضايقني و الابتعاد عن الناس المثيرة لحنقي .
أعتقد ان عندي القدرة على الجلوس مع الناس و محاورتهم مهما كانت طبقته الثقافية إلا في حال تعرضت للإذلال من هذا الإنسان بأي شكل من الأشكال و بأي وقت كان ، يعني لو سبق و حقرني هالانسان بغير وجه حق راح ينضاف اوريدي لهالقائمة .. انا مو بهذا السوء و لا بهذا الحذر لكن في كم شخص ببالي أعاني لما اجلس معاهم .
أعاني لإني متأكدة إن النقاش مايجري بالمجرى الطبيعي و إن مقياسك كإنسان أيضا هو مقياسك بحسب شكل شنطتك و هندامك و هذا الشي يعدمني تماما .تقدير الإنسان على حسب المادة شي حقير جدا للأسف .

لكن مؤخرا احاول و يمكن افشل في المحاولة لكن بودي لو مااتأثر من مزاجات هالناس و اعتقد الطريقة المثلى مو بالابتعاد لأن مهما ابتعدنا يجي يوم و نضطر نقابلهم و نرجع ألف خطوة و نتكدر و كمان لو انت تحاول تتجاهل أحد يصير كأنك مسوي هايلايت عليه و يبان لك أكثر لكن لو أعطيته حجمه الحقيقي و اعترفت بوجوده و تمنيت له الخير أو دربت نفسك على تقبل وجوده يمكن و يمكن لأن مو متأكدة إذا كنت راح اقدر اتسامح مع أحد يسيء إلي و إلى أهلي بأي طريقة ممكنة لكن في هالحالة راح يكفيني شرف المحاولة .

قبل سنتين توفت خالتي بطريقة مفاجأة ، لكنها خلفت في قلبي فكرة إنك تموت وحيد و هاذي الفكرة بالضرورة تخليك ماتهتم كثير لأشياء كنت تهتم فيها ، بعد فترة تسعة أشهر أو أكثر و أنا أعني من الحزن و الفقد اكتشفت إنه مهما كنت لطيف في الحياة محد راح يهتم لموتك إلا ناس قليل جدا .
راح تلقى كثير يطبطبون على ظهرك أسبوع واحد فقط مو اكثر و بعدها كل الناس راح ترجع لحياتها و بيطلبون منك تتجاهل كل شي و تعيش ، و هاذي الفكرة وصلتني لفكرة الإبتعاد عن أي شي يتعب نفسيتي.
التدوينة ملخبطة و شكلها يشبه اوراق الصباح بس فعلا احتاج افرغ ..يمكن احذفها