ليه نخاف من الصورة النمطية
لي صديقة تعرفت عليها عن طريق السوشل ميديا ،صديقة قريبة لقلبي نتناقش انا وإياها بين فترة و الثانية عن الشغل و المجتمع و أشياء زي كيذا ،البنت فيها ميزات رهيبة زي إنها ضد العنصرية ( و مو دايم تتعامل بإنصاف في المجتمع السعودي لو كنت غير سعودي ) و أنا اتفهم هذا التمييز لأسباب كثيرة يمكن اكتبها لاحقا،قالت لي إنها تعرف كثير ناس من عائلتي اللي يحملون اللقب مو اسرتي.
جلست ساعتين افكر اَيش الجوانب اللي تعرفها عننا ؟
لاحظت اني من عمر المراهقة و انا ارسم صورة لبيتنا و لأبوي و لعائلتي اللي ابى الناس و أصدقائي يعرفونها .
لاحظت اني أوجه تفكير صديقاتي عن عيلتي و اهلي و ارسم لها انا الصورة النمطية اللي ابغاها قريبة او بعيدة من الحقيقة مااعرف بس انا اللي اتحكم فيها نوعا ما ..
الحين مثلا احس لو ببدأ كلام مع أحد بتكلم عن بناتي مدري لو كنت ابى اوضح صورة معينة خصوصا في الجامعة احاول اثبت للدكتورات اني إنسانه مجتهدة :)
المهم صديقتي فوق مااعرف ايش تعرف عني و في نفس الوقت جانب الخوف اللي تكون تعرف جوانب سيئة و اللي اعتقد انها جوانب طبيعية من اي مجتمع .
فجأة فكرت ليش انا خايفة من انها تعرف هذا الجانب السيء ،في كثير من الأحيان اصلا احنا عرجنا على هاذي المواضيع و احنا نحكي من قبل.
هل انا اخاف من أفقدها او مثلا تسحب علي؟ طيب اصلا علاقتنا مو واااو يعني علاقة طبيعية .
طيب يا هاجر لو قُدر لك تشرحين لصديقتك مين انتي و ايش مجتمعك ايش بتقولين؟
اعتقد سؤال صعب
اقولها مثلا اسمي و ايش اسوي و حياتي اليومية اللي هي انا و علاقاتي و صديقاتي و مواضيعنا المشتركة و تحليلاتنا .
غريب كيف لما نخاف احد يلبسنا شي مو فينا غريب كيف لسى نهتم بنظرة الناس لنا نحبهم لو نكرههم مهما اعتقدنا اننا معتدين بأنفسنا و ان عندنا القدرة على الاختيار و القرار .
* كتبت التدوينة مساء في غرفة علية بالفندق.
تعليقات
إرسال تعليق