نقاش .

من اكثر الأشياء اللي تفرحني وتأثر علي النقاشات الحلوة مع ناس مستوعبة و فاهمه ، مااطلب يكون اللي قبالي شي اكثر من انه فاهم النقاش و مايحكم عليك من خلاله، و هذا الشي نادر نادر جدا يصير لي لكن اليوم صار لي مرتين و أكثر .

كنت محظوظة اليوم :)

أول شي كان عندي جلسة يوقا العصر و كانت جلسة عظيمة و رهيبة مرة و بعدها تكلمت مع المدربة و بالمناسبة هي بنت عظيمة جدا مااقدر اوصفها بأي وصف غيره  .

تكلمت معاها عن تربية أطفالنا لأن عندها بنتين مثلي، تكلمنا عن اللحظات الصغيرة معاهم عن كيف هم يبغون يشوفنناعن أشياء تمنيت لو اقدر اتكلم معاها ثلاث ساعات متواصلة.

تكلمنا عن البيزنس و وضعه النفسي و هذا اكثر شي مؤثر في حياتي اليومين هاذي .

بعدها رحت اسوي موعدي الشبه شهري للفيشل و تنظيف الوجه و كانت الاخصائية فلبينية و خضت معاها حوارات عميقة و عظيمة ، تكلمنا عن الديبريشن و الاكتئاب عند الوومن :) 

تكلمنا عن اللحظات الصغيرة عن الأطفال عن الاستمتاع بالحياة .

عن المسلسلات اللي نحبها و الكتب اللي نحبها ،قلت لها يمكن يعجبك كتاب eat, pray,love حق إليزابيث قيلبرت و شكلها تحمست له .

خلاصة القول :

ان الكلام ممتع لما يكون مع أحد رهيب ، أنا انسانة اعتزلت الواجبات الاجتماعية من فترة طويلة و نادرا اجلس في مجلس أكثر من ساعة ، و اعتذر بأطفالي و فعلا الوضع يخنق للأطفال و لي أيضا:)

في الإجتماعات العائلية الوضع يكون كيف تملك زمام المجلس أقوى و الوضع يحتدم أكثر لما يحس اللي قدامك إنه أقل منك  و تحس نفسك في مهمة لملء فراغ العظمة عنده ..

و في مهمة متعارف عليها عند الأقارب بشكل عام و هي تصغير الانسان في حضوره و تعظيمه و الاستكثار عليه في غيابه !

 اليوم كان جميل جدا ، صحيت الساعة ٩ الصبح و صادف ان بنتي و ابوها بإجازة و سوينا فطور كروسان جاهز مع بيض، استلهمت الوصفة من انستقرام قبل اعتزاله لمدة شهر ان شالله.

حكينا مع بعض و شربنا قهوة مقطرة كولومبية الظهر مع شوكليت جالكسي ،كنت مستمتعة بوجود ابو شادن معاي و مستمتعة انه بإجازة خصوصا انه (وورك هوليك ) مدمن شغل.

العصر رحت اليوقا و مهند راح مع شادن و ايلاف ملاهي الحكير و بعدين طلعنا الخبر و في الوقت اللي اسوي فيشل هم اشتروا لنا كنافة و قبلها تغدينا شاورما من اوشه و رجعنا البيت . و جا دور مهند ينبسط و طلع مع اصدقائه و انا افكر الحين انام أو أقوم اسوي عجينة كروسان .