علاقات قديمة.

كان لي صديقة من الطفولة تقريبا و هي قريبة قبل تكون صديقة، ساء ت الأحوال بيننا من ٤ سنوات تقريبا .
كانت علاقتنا قريبة جدا لدرجة ممكن اصنفها بأقرب شخص لي و لكن و في مفترق طرق افترقنا و الغريب إن هاذي و بطبيعة الحال و العمر ماهي اول علاقة تسؤ لي و ربما هي الأعمق صلة و لكن ،
حسيت براحة عجيبة لما افترقنا و لما بعدنا بطريقة صعب اشرحها ، ارتحت و كأنه لم يكن ، اللي ساعدني ان صديقتي فعلا راقية و لما فهمت اني انزعجت منها و اني ماااتحملها قدرت خياري و بعدت عني ، صح ماانكر انها حاولت ترجع العلاقة و كنت عند شرطي و كانت عند شرطها ، طبعا انا مو في موضع يسمح لي اشرح المشكلة اللي صارت بالتفصيل و لكن اللي صار اننا بعدنا و كان شي صادم لكثير من الناس من حولي و ارجع اكرر ان الحالة كانت مُريحة لدرجة لاتوصف.
و أعتقد هنا اتفكر في نعمة التخلي ، قضيت اربع سنوات من دونها و مااحس ان نقصني شي و لا احس بالحنين لأيامنا و لو تقابلنا بمكان اكن لها كل الود و الاحترام بس مو اكثر ، مااشتاق لحكيها مااوله عليها .
جلست فترة مفزوعة ليش صرت كيذا و بين فترة و الثانية يجيني احساس اللي يمكن كنت شديدة عليها اللي ماكان مفروض اقسى كيذا و في جهة ثانية كان يجي الإحساس اللي بالعكس بعد مابعدت عني شفت أشياء كثيرة بحياتي و كانت زي العقبة بطريقي بطريقة ما .

المهم صديقتي هاذي ولدت امس و كانت ولاداتها السابقة تتصل علي و هي في المخاض ادعي لها أو أي شي و لكن هذا المخاض مادريت عنه إلا بعد يومين تقريبا .
طبعا مااقدر ألومها و لا أقدر ألوم نفسي ، كانت حالة طبيعية جدا لموضع العلاقة اللي بيننا .

تكريما للود اللي بيننا اتصلت ابارك لها و حكينا شوي و حاولت حاولت اكون مرتاحة في الكلام معاها و كأنها ارتاحت و تكلمت لي بس بعد مماخلص الاتصال جاني احساس غريب ، للحين مافهمته لأن هذا الإحساس عادة يجيني لما انجبر على أحد ، في حالتي هنا ما كنت مجبورة انا اخترت الاتصال و اخترت الكلام .
* الحين عرفت الإحساس : احساس الغربة ، لما تكلم أحد غريب عنك بس بتحاول تكون منمق و لبق . يس هذا هو الاحساس للأسف.

بس بعد هاذي الحادثة صرت افهم العلاقات القديمة اللي نسمعها عن اثنين اصحاب او زوجين تفرقوا مثلا و استمرت علاقتهم طيبة و يكنون الاحترام لبعض،

الود في العلاقات القديمة مو سهل ، يتطلب اثنين واعيين و قلبهم ابيض و يستوعبون أحقية الخيارات و الرفض .
في كثير علاقات حولي ابى اتخلص منها و اكون مشيت شوط فيها بس لأن الطرف الثاني يختار النفاق و لبس الأقنعة فتضطر توقف في مكانك على الأقل و تبقى في علاقة مسمومة و مؤذية .

تحية للناس الواضحة اللي تسهل عليك الحياة و تخبرك بمشاعرها الحقيقية تجاهك .