اليوم التاسع عشر و الود

أحب الأيام البطيئة و البسيطة
أغلب الوقت كان بالبيت صحيت الساعة ١١بدون منبه و نمت ٣ قبل الفجر، نومة رائعة و الحمدلله

طلبت لي سموثي و كرات الطاقة(عبارة عن شوفان و فول سوداني و عسل ) عشان اتقهوى عليها ،و بعدين جا ابو شادن من اجتماعه و جلسنا شوي و حاولت اسوي غدا بس محد كان يبى اكل:)
العشا طلبنا برقر من محل لذيذ يمكن هاذي خامس مره نطلب منه خلال شهر تقريبا و أصلا انا من الناس اللي تحب البرقر ، وطلعنا المول و اشتريت بجاما لطيفة من محل وومن سيكرت و البجايم اللطيفة من الأشياء اللي تساعد في تغيير مزاجي ، افكر اكتب لسته للأشياء اللي تغير مزاجي عشان ارجع لها لو طنقرت :)

شادن دخلت معاي محل البجايم و كانت مبهورة بالرسومات اللي عليها و كانت تسألني بكم هذا ياماما و لما اقولها السعر كانت تشهق انه غالي و طبعا شادن بمخها ان أي شي سعره فوق المية يعتبر غاااالي جدا و أي احد عنده أكثر من مية ريال يعتبر مليونير ،فجأة و احنا في قمة التسوق دخلت إيلاف عندنا المحل و شالت قطع ملابس داخلية وجابتها للكاشير،كان الوضع محرج و مضحك في نفس الوقت و اللي يضحك أكثر انها كانت تلزم علي اشتريهم :)

و رجعنا البيت طبعا و ناموا بناتي و جلسنا نتفرج فريندز و فريندز يعتبر روتين يومي عندنا ،تقريبا من سنة ونص من اول ماطلع على نفلكس و هاذي ثالث مرة نعيده :)
اليوم جالسه احسب كل شي ثالث مره خامس مره ، في مشكلة رقمية بمخي ..

يوم لطيف جدا و مريح و نمت من الساعة وحدة تقريبا و كانت نومه رائعة و الحمدلله

في أفكار كثير كانت تدور بمخي امس و كان المفروض اكتبها بملاحضات الجوال عشان ارجع لها بعدين بس اقرب فكرة كنت افكر فيها و أنا ابدل فازة الورد عندي بالصالة ، كان الورد باقي فيه يعيش اسبوع يمكن زيادة بس كنت افكر ان فيه اشياد كثيرة نخليها للأخير ،علاقات كثير يشوبها سوء فهم او كلمة سيئة و نجلس في هالعلاقة وقت إلى مانوصل لفكرة ان هالعلاقة مؤذية بعد وقت طويل و جهد كبير ، بعد ماتكون هالعلاقة استنزفت جزء كبير من راحتنا نكون استوعبنا انها علاقة مؤذية .
كنت افكر ان هالورد الحين كويس نوعا ما مو فريش بس مو معفن ! بس ما،دي اخليه الى ماتطلع ريحة العفن أو يذبل أكثر و تضيع جماليته ، و تتشوه صورة الورد الجميل الفريش اللي يبعث على السعادة و تتحول إلى ورد ذبلان و مقطع و معفن .
هل عندنا القوة و الجرأة عشان نوقف العلاقات المؤذية و هي في بدايتها ، و هو لسا باقي ود بيننا و لا لازم نوصل للمرحلة الأخيرة و تطلع ريحة العفن ؟!