اليوم السادس عشر و الأرق

الأربعاء ٢:٤٣ الظهر

بديت اتعود الكتابة هنا و صارت تُشعرني بالراحة أو الرضا .
اليوم مشاعر مختلطة و متناقضة تماما ، صحيت ٤:١٠ الفجر و كنت نايمة تقريبا ١٢ و يعتبر وقت حلو جدا بالمقارنة مع نومي السنتين الأخيرة.
سويت يوقا لرقبتي و كتوفي لإن كنت احس بشد و تحجر فيها و الشي المميز اليوم ان عندي شغل الساعة خمسة ونص صباحا:)
و طلعت من البيت ٥ و ربع تقريبا و كنت ناوية مااشيل بناتي معاي لإن بالعادة يكونون لسا نايمين بس انتبهوا لي لإني دخلت اضبط كاميرا للمراقبة عشان اشوفهم بس قفطوني في هذه الأثناء و شلتهم معاي بالسيارة.

خلصت شغلي ست و ربع تقريبا و رجعنا البيت بسرعة و لبست شادن المريول و مشطت شعرها و قرأت اذكارها و كنت اوريدي مجهزه فطورها و يللا باااي شادن :)
و بعدها ايلاف بنفس المراحل و تزيد اني اطلع اوصلها كمان لإن قلبي مايتحمل تروح لحالها :)

قضيت بعض الاشغال و عندي محاضرة الساعة عشرة و كنت ناويه اخذ غفوة من الساعة ٧ بس انشغلت و نمت متأخر و قمت لقيتها ١١وربع و لو راح اروح الجامعة بيكون الكلاس خلص ،ان شالله ماانقص على الحضور .

اكتشفت ان محصول القهوة صفر و كنت بأشد الحاجة لها فطلبت من مرسول انه يجيب لي طلبية القهوة لموجودة عند سمسا للتوصيل و الحمدلله حصلت على كوبين لذيذين دبل شوت و سينق شوت ، الأول حاجة و الثاني رفاهية .

يوم الأربعاء هو يوم مفضل لبناتي لإنهم يروحون لنادي أطفال الى العشاء .


الحين صارت الساعة ١٢:٠١ نفسي انام ، تقلبت كثير ع السرير ،اخذت فيتاميناتي ، رشيت لافندر على المخدة ،اكلت شوية شوكليت احيانا احسها تساعدني على النوم بس لسا مااحس بالنوم .
افكر اخذ شاور دافي أو افتح نتفلكس ،احيانا يجيني النوم و انا اشوف التي في او اليوتيوب خصوصا لو كان الرتم هادئ.
ابى اتذكر متى بدأ الأرق عندي ، تقريبا بعد ماخلفت شادن مريت بتجربة الأم الخارقة و كان نومها متقطع و أقوم معاها من اول صيحة و ماارحع انام لحد ماجاني خفقان في قلبي و كنت احس بدوخة بس تعدل نومي و صار كويس حتى بعد ماجبت بنتي الثانية اتذكر نومي كان جيد.
اعتقد هذي المشكلة من سنة ونص الى سنتين و زادت حدتها بعد وفاة أقارب لي و للحين مو قادرة اسيطر عليها تماما.
صحيح اليوقا ساعدتني ارمم المشكلة و احاول انام بس لسا اعاني كثير .
وضعي الحين افضل على الأقل في ايام انام ١١ أفضل من ٩ الصبح مثلا غير ان مدة النوم نفسها جدا قليلة ، يعني عادي انام ساعتين ثلاث ساعات و احس بنشاط و ممكن اليوم كله يعدي على هالساعتين ، اليوم كمثال انا صاحية ٤:١٠ و الحين ١٢:٠٨ و مانمت الا نومج الصبح من ٩الى١٢.
الله يفرجها من عنده حقيقةً مشكلة الأرق