و تحمل الصعوبات٤٧
الحين أنا في محل قهوة جديد علي،و طلبت اسبرسو دبل و بعدها ون شوت لأن ماامدى انبسط عليها إلا خلصت:)
الصبح ماشربت قهوة و وعدت نفسي اشرب لاحقا في كوفي شوب،و اخذت كلاس رياضيات أو ماث لذيذ جدا،حرك مخي و جرني لذكريات ثالث ثانوي و اختبارات القدرات .
مشغلين أغنية أحلام و هاذي الأغنية كنت نسمعها بالجبيل ،ذبل *كل الفرح حتى الثواني مالها توقيت ،يلازمني خيالك !
أمس حسّيت انو من زمان ما جلست لحالي و احتاج هدوء ،كنت ناوية اطلع صالون اسوي أظافري بس قلت قهوة اسرع .
نفسي أدون بشكل يومي و الأسبوع الماضي لاحظت ان عملية الكتابة محببة لي و جلوسي للكتابة عمل ممتع و غير مجهد بالنسبة لي ،على النقيض من شغلي السابق و اخر تجربة لي كانت قبل امس ،اضطريت أوافق على حجز يناير بعد ما ألغيته لأن العميلة أصرت و كنت متوفرة إلى حد ما بالإضافة إلى إني صرفت الشهر هذا في المتعة و بالغت بحكم إنها إجازةو بذرت في سبيل المتعة و الوناسة .
كان الحجز يوم الجمعة ،كان يوم ثقيل و بالمناسبة اعتذر لنفسي على اربع سنوات من العمل المضني اللي مريت فيه ،باخر كلاسات اليوقا و لما يجي وقت التنفس و الميديتيشن كان يجيني احساس اعتذر لنفسي و احبها بس ما كنت عارفة لأي سبب بالضبط ،لكن بعد يوم الجمعة عرفت كيف جلسات حجز الميك اَب عمل مضني تماما و مجهد .
في البداية ما قدرت انام اليوم اللي قبل و عانيت من ارق و الأيام اللي قبل تجيني لحظات خوف إني أنسى الحجز و يفوت الموعد و لا اسافر الرياض و ما انتبه :)
و قمت من النوم ثقيلة و اخذت شاور و شربت اسبرسو و رحت ،بقيت واقفه من الساعة ٢و نص ابى ٦ ونص ،أربع ساعات واقفة تماما و بطريقة غير مريحة للظهر و الرقبة ،خلصت و انا حس ظهري متشنج و يابس تماما و مو قادر يوقف جسمي و انتبهت اني كثير من قبل تعرضت لهذا الموقف و كنت اعتبره عادي و اتجاهل الآلام و أعدي يومين ثلاثة متأذية.
رجعت و سويت يوقا بسيطة عشان يخف الألم و كمان نظفت بيتي لأن احتاج راحة نفسية ،و هاذي التجربة الأخيرة خلتني أتأكد تمامًا من صحة قراري بتوقيف الشغل .
احنا كثير نسمع عن الصعوبات المصاحبة لأي شغل نحبه بس ما نعرف متى تكون هاذي الصعوبات مرهقة ليس إلا و تعبها و جهدها أكثر من ثمرتها ،و هذا شي نتعلمه مع الوقت و نتعلم نقيس ثقل الأشياء و صعوبتها مو شرط أساسي لنجاح الأشياء و تحقيق الأهداف.
كيف أعرف إن الصعوبات اللي امر فيها صحية لأجل تحقيق الهدف أو إنها تلميحة لأنك في مسار خطأ و طريق مسدود ؟
إذا كان الرتم متذبذب بمعنى إنك تواجه صعوبة في شغله معينه و بمجرد ما تلقى لها حل تنتهي و تجي فترة جيدة من الراحة هنا تقدر نقول إنها صعوبات طبيعية لكن
لو كانت صعوبات ماتنتهي و لا يوقف رتمها فأعتقد إنها إنذار لك
تعليقات
إرسال تعليق