يوم عادي، اليوم الثالث

مااعرف ايش اكتب ، فاتحة الصفحة من ثلاث ساعات و مخليتها في الباك قراوند  جالسة اتصفح كل المواقع حق الشوبينق من اثاث مثل ايكيا و وست الم و انثروبولوجي و الرقيب و هوم سنتر الى الملابس و الشوزات ، احتمال انقل بيت جديد فجالسة استعرض خياراتي لان ابى اجيب لي سرير جديد أو اجيب لبناتي فمحتارة لان قبل شهر اشتريت هيكل سرير من سليب هاي مقاس ٩٠*١٢٠ حبتين فإذا جمعتهم يصيرون سرير كينج و إذا فككتهم يصيرون فردي ، نفس فكرة أسرة الفنادق بس احترت ايش استخدمه بالضبط لي أو لبناتي !

صحيت الساعة خمسة الفجر صليت و جلست اقرأ قران و قلت استغل قبل تحمى الشمس اغسل الثياب لان غسالتي ما تشتغل اذا المويه حاره .

خلصت الغسيل و غسلت عباتي الجديدة لان ريحتها مره عطر و لما لبستها امس كنت حاسة اني مو انا لان مو عطري ، و العطر لفتة من المصممة ، و الحمدلله ما خربت علي كنت خايفة تخرب من الغسيل لانها كتان .

كمان سويت عجينة بيتزا عشان لو نبى نتغدا بيتزا بعدين لانو امس كان بخاطري بيتزا مرة و لما طلعنا بالليل انا و مهند لقينا كل المطاعم على وشك التقفيل أو زحمة مرة فمرينا اخر شي برقر فايف قايز و انبسطنا الحندلله و البنات كانوا في البيت نايمين و كنت اراقبهم بالكاميرا لأن حسيت لو شلناهم بيكونون مرهقين جدا ، و سمحت لهم يتفرجوا ع الليباد قبل ينامون و صرت اتابعهم و بعدين اتصلت علي شادن من فيس تايم الايباد و قالت لي انو اسفين اننا ما نمنا للحين و ايلاف كانت تقول ماما انا اسفه ان ماخليت شادن تنام:)

امس سوينا انا و البنات كيكة شوكولاته و الصراحة انهم انبسطوا مره و هم يسوونها معاي و حبيت تفعلهم بس انا صدعت و اندوشت الف مره و هم معاي في المطبخ :)

جالسة افكر اني ادور لي اشياء اسويها عشان مع هجر السوشل ميديا صرت فاضية 

اليوم هو ثالث يوم ، اللي هو امس ، ماحسيت ان الوقت صار بطيء ، احس بملل شوي ، بس كمان احس صرت مركزة على البيت و على البنات اكثر و حتى صرت ابى احط ميك اب و البس ، مااعرف ايش الرابط .

يوم الاثنين كان عصيب شوي علي و يمكن ان اثار الادمان كمان ساعدت في اني اكون مستاءة أكثر .