الخوف من النجاح

دائما لما اجي اكتب في المدونة اكون مرتاحة ان محد يقرأ لي ، و لكن لما افكر بجدية بأني انشر كتاب أو رواية يراودني الخوف بالطريقة المعاكسة ، أخاف محد يقرأ لي:)
كثير من الهوايات اخاف من تعلمها بس بسبب الخوف من الفشل و الخوف ان محد يقرأ لي أعتقد انه يندرج تحت شكل من اشكال الفشل ، الفشل في تقبل الناس لعملك ، حتى الفشل المادي .
و لهذا دائما انا اهرب من اتقان الأشياء اللي احبها ، اهرب من تعلم الكتابة و تعلم اليوقا  و حتى تعلم القهوة ، اخاف تحت مسميات ثانية غير الخوف .
اخاف تحت مظلة خلاص اعرف و فاهمة و أحيانا يكون العذر منطقي تماما زي مثلا اشتركت بدورة قهوة الشهر القادم ، سعرها مرتفع بعض الشيء و لكن اشعر انه بيأسسني و بتعلم بإذن الله بس يجي صوت الخوف يقولي مجال القهوة متشبع جدا و مستوعبينه الناس كويس.
للحين أنا ماادري هل خوفي في مكانه خصوصا ان المبلغ نوعا ما غالي .
و كمان كنت اسمع بودكاست لهيفاء صاحبة مدونة قصاصات تتكلم عن مواجهة الخوف و شعور الفيبو و كلام جميل و كان في نقطة حفرت في مخي لما قالت ان لما تخاف من عمل ما اتخيل اسوأ شي ممكن يصير لو سويته، و لو كان ماراح يقتلك و يتسبب لك بالموت فما في داعي تخاف و سويه .

طيب بعد اكثر من شهر على وجود هاذي التدوينة في المسودات ..
دورة القهوة انلغت بسبب فايروس كورونا لكن رجعت لنقطة البداية و حاليا انا متاكدة تماما انه ماينفع اشتغل بشي انا احبه .
للحين افضل احتفظ بهواياتي على اساس انها هوايات و مهرب و تحلاية للحياة و شي يجلب السعادة .
أعتقد راح استمر على هذا حتى حين .